له‌ڕێکه‌وتی/20/4/2014. میدیا ڕوداو نێت، هه‌واڵیکی به‌ڵاو کرده‌وه له‌ژێر مانشێتی(لێدوانی مالیکی له‌باره‌ی سه‌ربه‌خۆیی کوردستان) له‌ناوه‌ڕۆکی هه‌واڵه‌که‌دا هاتبو، له‌هه‌ڤپه‌‌یڤینێکدا له که‌ناڵی(المنار) ئه‌نجامیداوه، مالیکی ده‌بێژێ" هه‌ڕه‌شه‌کانی هه‌رێمی کوردستان له‌باره‌ێ جیابونه‌وه به‌دوو باره وه‌سف ده‌کات و ده‌ڵێت: هیچ که‌سێک له‌هه‌رێمی کوردستان یاخود لایه‌نی دیکه، مافی ئه‌وه‌ی نیه سه‌رپێچی ده‌ستور بکات، ده‌رباره‌ی مافی چاره‌ی خۆ نوسین، کورد بڕیاری له‌چاره‌‌نوسی خۆیدا، کاتێ ده‌نگیان به ده‌ستوردا، که‌تێدا هاتووه، ئێراق ووڵاتێکی ئیتیحادی و سه‌‌ربه‌خۆیه‌و ده‌ستور ده‌سته‌به‌ری یه‌کیه‌تی ئێراق ده‌کات" هه‌روه‌هاش له‌قسه‌کانیدا، مالیکی ئه‌ڵێت" تهحهدا ده‌كه‌م، ئه‌گه‌ر به یه‌ک خالێش سه‌رپێچی ده‌ستورم کردبێت، به‌ڵام من ده‌یان به‌ڵگه پێشکه‌ش ئه‌که‌م، که ده‌یسه‌لمێنێ سیاسیه‌کان سه‌رپێچی ده‌ستوریان کردووه"!.
هه‌ر له‌دووای مالیکی به٣ ڕۆژ، واته٢٣/٤، ڕوداو نێت هه‌واڵیکی تری داگرتووه له‌ژێر مانشێتی(شه‌هرستانی: هه‌ولێر مافی ئه‌وه‌ێ نیه مامه‌ڵه به‌سامانی نه‌وت بکات). له‌ناوه‌ڕۆکی هه‌واڵه‌که‌دا هاتوه، له‌چاوپێکه‌وتنێکی ته‌له‌فیزیۆنی، له‌که‌ناڵی سۆمه‌ریه، شه‌هرستانی ده‌ڵێ" هه‌ندێ له‌به‌رپرسانی هه‌رێم به‌مافی خۆیان ده‌زانن مامه‌ڵه له‌گه‌ڵ نه‌وتی هه‌رێمی کوردستان بکه‌ن به‌ڵام من له‌گه‌ڵ ئه‌مه‌دا نیم" خۆ دیاره زۆر ووته‌و بۆچونی خه‌یاڵاوی و بێسه‌روبنی تریان وروژاندوه، به‌ڵام بۆمه‌به‌‌ستی من لێره‌دا، هه‌ر ئه‌وه‌نده به‌سه بۆ وه‌ڵامدانه‌وه‌و شرۆڤه له‌سه‌ر کردن!.
له‌کۆمه‌ڵگای کورده‌واریدا ئه‌وه باوه، کاتێ ئه‌بینن که‌سێک ده‌ست به‌قسه‌ی "ئه‌له‌‌قو به‌له‌ق" واته بێسه‌روبه‌ر ئه‌کات، پێی ئه‌وترێت خه‌ڵه‌فاوه. چونکه مرۆڤی هۆشیار و له‌سه‌ر خۆ، له‌هه‌رچی پایه‌و پله‌یه‌کدابێت، ئه‌گه‌ر بیه‌وێت درۆیه‌کیش بکات له‌پێناو به‌رژه‌وه‌ندی خۆیدا، به‌جۆرێک ئه‌یکات، ئه‌گه‌ر هه‌مو که‌سێکیش باوڕ نه‌کا پێی، چه‌ند که‌سانێکی ساوێلکه‌و نه‌زان باوڕی پێ بکه‌ن. به‌ڵام ئه‌گه‌ر به‌وردی له لاژه لاژه‌که‌ی نوری مالیکی سه‌ڕۆک وه‌زیرانی ئیراق سه‌یرکه‌یت، به‌ڕاستی جێگه‌ی سه‌رسوڕمانه، زۆریش دڵخۆش بوم نه‌‌سه‌رکردایه‌تی و نه‌حکومه‌تی هه‌رێکی کوردستان وه‌ڵامیان نه‌دایه‌وه، وه‌ک بایه‌خ پێنه‌دانێک. بۆ نمونه زۆر به‌کورتی:
أ-ده‌رباره‌ی هه‌ڕ‌‌ه‌شه‌ی جیابونه‌وه، به‌دوباره باسی ده‌کات. به‌ڵام وادیاره یان که‌ڕه‌و نابیستێ، وه‌یان هۆشی له‌ده‌ست داوه‌و ئاگاداری ئه‌وه نیه، که نه‌ک دوباره، به‌ڵکو سه‌ت باره‌‌ش کراوه‌ته‌وه‌و هه‌رئه‌وترێته‌وه هه‌تاکو به‌ئه‌نجام ئه‌گه‌یه‌ندرێت، ئه‌وه مافێکی ڕه‌وای گهلی کورده‌و. له‌لایه‌ن عه‌ره‌به‌وه زه‌وت کراوه‌و، دیاره مافیش نادرێت، به‌ڵکو به‌زۆر ئه‌سه‌ندرێته‌وه، ئه‌گه‌ر مالیکی که‌سێکی ژیر بووایه، ئه‌بو ئه‌وگۆڕانکاریانه‌ی له‌ته‌مه‌ن خۆیدا بینیویه، که کورد له‌به‌رانبه‌ر ئێراقی داگیرکاردا چۆن به‌ره‌نگار بۆته‌وه‌و، سه‌رکه‌وتنه یه‌ک له دووای یه‌که‌کانی به‌ده‌ست هێناوه وه‌کو:
له سه‌ده‌ی ڕابردوداو، له‌سه‌ره‌تای شه‌سته‌کاندا شۆڕشی ئه‌یلولی مه‌زنی به‌رپا کرد به‌سه‌رۆکایه‌تی موسته‌فا بارزانی نه‌مر و پێشڕه‌وایه‌تی پارتی دیموکراتی کوردستان، دووای ته‌نها ٣ێ ساڵ، چۆکی به‌ڕژێم داداو ملی پێکه‌چ کرد، هاته سه‌ر مێزی گوفتوگۆ، پارتی داوای مافی لامه‌رکه‌زی سیاسی ئه‌کرد، به‌غداش به‌لامه‌که‌زی ئیداری ڕازی بو، به‌ڵام کورد قه‌بوڵی نه‌کرد، شه‌ڕی ده‌ست پێکرده‌وه.
دووای سێ ساڵی تری، له کۆتایی ساڵی٦٦ ش، جارێکی تری ڕژێم ملی که‌ج کرد بۆ لامه‌رکه‌زی سیاسی، کورد داوای ئۆتۆنۆمی کرد، ڕژێم ڕازی نه‌بو، سه‌رۆک موسته‌فا بارزانی شه‌ڕی ده‌ست پێکرده‌وه. نزیکه‌ی سێ ساڵی تری نه‌برد، ڕژێمی بهغدا چۆکی دادایه‌وه، ملی که‌چ کرد بۆ پێدانی ئۆتۆنۆمی، به‌ڵام دووای چوار ساڵ گوفتوگۆ له‌سه‌ر چۆنیه‌تی ناوه‌ڕۆکی ئۆتۆنۆمی، ڕژێم په‌شیمان بووه‌وه، بارزانی شه‌ڕی ده‌ست پێکرده‌وه!.
سه‌رکردایه‌تی سیاسی کورد کۆڵی نه‌دا، تاکو ڕاپه‌ڕینی جهماوهری ٩١ ڕویداو، کورد نیمچه سه‌ربه‌خۆیه‌کی به‌ده‌ست هێنا تاکو ئه‌و ڕژێمه ڕوخا، بهغدا ناچاربو دان به‌مافی فیدراڵێدا بنێت و له‌ده‌ستوردا جێ جگیرکرا که‌تاکو ئێستاش کورد پابه‌ندی ئه‌و ده‌ستوره‌یه!.
دیاره ئێستا ڕژێمێکی تری هاوشێوه‌ی ڕژێمه‌که‌ی سه‌دام حوسێن، که حیزبی به‌عسی ڕه‌گه‌ز په‌رست پێشره‌وی بو، خه‌ریکه بێته کایه‌وه، نوری مالیکی له‌جێگه‌ی سه‌دام و حیزبی ده‌عوه‌‌ش، له‌جێگه‌ی به‌عس، پێشڕه‌وایه‌تی ئه‌کا، گهلی کورد ووته‌یه‌کی هه‌یه ئه‌ڵێت" تاریکی شه‌و، سه‌رله‌ئێواره دیاره" ئه‌وڕێچکه‌یه‌ی نوری مالیکیش گرتۆتیه‌به‌ر، به‌رانبه‌ر به‌مافه ده‌ستوریه ڕه‌واکانی گهلی کورد، پاشگه‌زبونه‌وه‌یه له ناوه‌ڕۆکی ئه‌و ده‌ستورهکه‌واته ئه‌و ڕژێمه‌‌ی نوری مالیکی ئه‌یه‌وێت بنیاتی بنێت و مافی گهلی کوردی پێشێل بکات، هیچ گومانێك هه‌ڵناگرێت، جیابونه‌وه‌‌و سه‌ربه‌خۆیی کوردساتانی پێوه دیاره‌و دڵ خۆشکه‌ره، به‌سه‌‌تان هه‌ڵپه‌ی مالیکی و پارته‌که‌ی به‌رگری لێناکرێت و ده‌وڵه‌تی سه‌ربه‌خۆی کوردستان له‌دایک ئه‌بێته‌وه!.
ب- مالیکی دهبێژێت: تهحهدا ئه‌که‌م ئه‌گه‌ر به‌یه‌ک خالێش سه‌رپێچی ده‌ستورم کردبێت. لێڕه‌شدا خۆ زۆر به‌رونی ده‌ر ئه‌که‌وێت، یان ئه‌وه‌تا مالیکی هۆشی له‌ده‌ست داوه‌و نازانێت چیی به‌ده‌میدادێت، وه‌یان ئه‌وه‌تا نازانێت ده‌ستور چیه‌و چێ له‌ناوه‌ڕۆکی دایه، وه‌یان هه‌ڵوێست و بۆچون و قسه‌کانی خۆی به‌ده‌ستور ئه‌زانێ له‌به‌ر ئه‌وه‌ی بڕوای پێدرواوه سه‌رۆکی حکومه‌ت بێت، وه‌ک فیرعه‌ونه‌کان چۆن ئه‌یانوت، ووته‌ی ئێمه ووته‌ی خودایه، نوری مالیکیش پێێ وایه، ووته‌ی ئه‌و، واته ده‌ستور، سه‌رپێچی کردن لێی سه‌رپێچیه له‌ده‌ستور!.
خۆ ئاشکرایه ئه‌وه ته‌نها کورد نیه که بانگه‌واز ئه‌کات مالیکی سه‌رپێچی له ده‌ستور کردووه، به‌ڵکو هه‌موو لایه‌نه سیاسیه‌کانی ئێراقه، ته‌نانه‌ت به‌لایه‌نه مه‌زهه‌بیه پیرۆزه‌کانی شیعیشه‌وه، ته‌نها لیسته‌که‌ی ده‌عوه‌ی خۆی نه‌بێت، ئه‌وه‌ش وه‌ک ئه‌وه وایه، ووتیان ڕێوی کێ شاهیدته، ووتی کلکم!.
ته‌نها یه‌ک پرسیار به‌سه بۆ سه‌لماندنی ئه‌و ڕاستییه، یان ئه‌وه‌تا زۆر گه‌مژه‌یه‌و، واتێ ئه‌گات گهلی ئێراق به‌گشتی وه‌ک خۆی گه‌مژه‌یه له‌هیچ شتێک سه‌ر ده‌رناکات، ئه‌گینا هه‌ر ئه‌وه‌نده ده‌سه‌ڵاته‌ی قورخی کردوه بۆخۆی، به‌سه بۆ ئه‌وه‌ی هه‌مو ووته‌کانی بێبنه‌ماو سه‌ر لێشێواوی پێوه دیاره، بۆیه منیش نامه‌وێت زیاتر بایه‌خ به‌شرۆڤه کردن بده‌م له‌سه‌ر ووته‌و بۆ چونه‌كانی، چونکه هێنده لاوازن له‌وه زیاتر هه‌ڵناگرێت!.
هه‌زار ڕه‌حمه‌ت له‌پێشینان که‌فه‌رمویانه" ته‌یری گول، عه‌شقه به‌داری زه‌قنه‌بوت" ده‌رباره‌ی لاژه لاژه‌که‌ی حوسێن شه‌هرستانی به‌ڕچه‌ڵه‌ک ئێرانی، که دهبێژێت" هه‌ولێر مافی ئه‌وه‌ی نیه مامه‌ڵه به‌سامانی نه‌وت بکات. له‌چاوپێکه‌وتنێکی ته‌له فیزیۆنی، له‌که‌ناڵی سۆمه‌رییه‌دا، هه‌روه‌ها له‌ناوه‌ڕۆکی قسه‌کانیدا ده‌بێژێ" هه‌ندێ له‌به‌رپرسانی هه‌رێم، به‌مافی خۆیان ده‌زانن مامه‌ڵه له‌گه‌ڵ نه‌وتی هه‌رێمی کوردستان بکه‌ن، به‌ڵام من له‌گه‌ڵ ئه‌وه‌دا نیم، ئێمه‌ش سه‌رمان له‌وه سوڕماوه، ئه‌و کێیه‌و خۆی به‌چی دایه‌نێ! وادیاره ئاگادار ئه‌وه نیه که نزیکه‌ی یه‌ک سه‌ده‌یه کورد فه‌رمویه‌تی" حه‌یفه ئویژدانتان به‌وه ڕازی بێت، گورگ له‌ناو مه‌ڕدا هه‌ر خۆی قازی بێت" وادیاره هێشتا هه‌ستی به‌وه نه‌کردوه، کورد به‌رانبه‌ر به‌و ئه‌جه‌نگێ و به‌دوژمنی ئه‌زانێ!.
ئه‌وه سه‌یره، ئه‌م وه‌زیره سه‌ر لێشێواوه خۆشه‌ویسته‌ی مالیکی، له‌لایه‌ک ئاماژه به‌وه ئه‌کات، گووایه هه‌ندێک له‌به‌رپرسانی هه‌رێمی کوردستان به‌مافی خۆیانی ئه‌زانن، مامه‌ڵه له‌گه‌ڵ نه‌وتی هه‌رێمی کوردستان بکه‌ن، به‌ڵام ئایه ئه‌توانێت بیسه‌لمێنێت ته‌نها یه‌ک به‌رپرسێک له‌گه‌ڵ ئه‌و هه‌ڵوێسته‌‌دا نه‌بێت؟. ئه‌ی بۆ بیر له‌وه ناکاته‌وه، ئه‌گه‌ر سه‌رکردایه‌تی سیاسی و حکومه‌تی هه‌رێمی کوردستان ڕێگر نه‌بن له‌به‌رده‌م جهماوهری خۆ ڕاگری گهلی کوردستاندا، ته‌نانه‌ت ناهێڵن یه‌ک به‌رمیڵ نه‌وتی شاره‌که‌ی باوه گوڕگوڕێش بڕژێته ناو بۆڕیه دزێوه نه‌وتیه‌که‌ی به‌غداوه! وادیاره نه‌ک ته‌نها هۆش، به‌لکو چاو و گوێچکه‌شی له‌ده‌ست داوه، هه‌موی چه‌ند ڕۆژێکه ئه‌و حه‌‌شاماته‌ی به‌رده‌رگای سه‌ره‌کی کۆمپانیای نه‌وتی باکور" که‌رکوک"ی نه‌بینی ویستیان ده‌ست به‌سه‌ر کلیلی هه‌نارده کردنی نه‌وته‌که‌ی که‌یواندا بگرن، ئه‌وه به‌س نیه، بۆکه‌سێک ته‌نها چاو و گوێچکه‌ی کار بکات، له‌و هه‌ڵوێسته‌ی گه‌وره‌و بچوکی گهلی کورد بگات؟( عدو عاقل خیر من صدیق جاهل) هه‌رچه‌نده خۆت و سه‌رۆک وه‌زیرانه‌که‌ت، نه‌ک دۆست نین، به‌ڵکو له‌ناخدا دوژمنی کوردن، به‌ڵام له‌وه زیاترتان له‌ده‌س نایه‌ت و له‌وانه‌ی پێش خۆتانه‌وه‌ش سه‌رکه‌وتوتر نابن!.
له‌لایه‌کی تره‌وه شه‌هرستانی دهبێژێت"من له‌گه‌ڵ ئه‌وه‌دا نیم" ئێمه‌ش ئه‌پرسین ئه‌ی جه‌نابی وه‌زیر، پیمان ناڵێت تۆ، سه‌لکی سیری وه‌یان قنچکی بیازی، تۆ چ په‌یوه‌ندیه‌کت به‌و بواره‌وه هه‌یه، جاخۆ ئه‌گه‌ر تۆئه‌نده ده‌سه‌ڵات داربێت به‌سه‌ڕ کوردستاندا، دڵنیاین ڕێگه به‌هه‌ڵبژاردنه‌که‌ش ناده‌یت و هه‌ر به‌یانی، ئه‌نفالێکی تری به‌رپا ئه‌كه‌یت، ئیتر تاکه‌ی شه‌رم ناتانگرێت و به‌وجۆره له‌به‌رانبه‌ر ئیراده‌و بڕیاردانی سه‌رکردایه‌تی سیاسی گهلی کوردستان خۆتان فش ئه‌که‌نه‌وه‌و نیشان ئه‌ده‌ن، گهلی کورد بڕوای به‌توواناداری خۆی هه‌یه‌و ئه‌توانێت مافه ڕه‌وا داگیرکراوه‌‌کانی چاره‌ی خۆنوسین، چ به خۆشی و چ به‌ناخۆشی بێت، ده‌سته‌به‌ر بکات، هاکا بینیتان چۆن به‌ده‌ستی ئه‌هێنێت، دیاره ئێمه‌ش ئه‌وبٶچونه چه‌واشه کاری و خه‌واڵۆییانه‌ی به‌تایبه‌ت سه‌رۆک وه‌زیرانه‌که‌ت و به‌ڕیزت ئه‌بینین، بۆیه گومانمان په‌یدا کردوه له‌ته‌ندروستیتان، بێ دودڵی وتومانه: پێده‌چێت لهبهغدا په‌تای خه‌ڵه‌فاوی پهرهی سه‌ندبێت، چونکه بۆچونه‌کانتان، جێگه‌ی سه‌ر سوڕمانه!!!.
24-4-2014.