به‌غدا مووچه‌ی فه‌رمانبه‌ران و بودجه‌ی حكومه‌تی هه‌رێمی كوردستانی بڕی، داعش هێرشی كرده سه‌ر موسڵ و پانتاییه‌كی جوگرافیای به‌رفراوانی سوننه‌نشینی له‌ژێر ده‌سه‌تی سوپای شیعه ده‌رهێنا، به‌و هۆیه‌وه خه‌ڵكێكی زۆر ئاواره بوون و كوردستان بوو به په‌ناگه‌ی لێقه‌وماوان، داعش شه‌ڕی به‌سه‌ر كورددا سه‌پاند و پێشمه‌رگه بۆ به‌رگری كردن له كوردستان و پاراستنی ده‌ستكه‌وته‌كان خرایه حاڵه‌تی ئاماده‌باشی و به‌رپه‌رچدانه‌وه‌ی هێرش و په‌لاماره‌كانی داعش، نه‌ناردنی بودجه و بڕینی مووچه‌ی فه‌رمانبه‌ران و هاتنی به لێشاوی ئاواره و تێچووی به‌ره‌كانی جه‌نگ، حكومه‌تی هه‌رێمی كوردستانی خسته قه‌یرانی داراییه‌وه، بۆ تێپه‌ڕاندنی ئه‌و قه‌یرانه‌و زاڵبوون به‌سه‌ریدا حكومه‌تی هه‌رێم وه‌ك یه‌كێك له رێكاره‌كان و بۆ ئیداره‌دانی ئه‌و بارودۆخه ناهه‌مواره نرخی به‌نزینی به شێوه‌یه‌كی كاتی به‌رز كرده‌وه، ئیتر ئه‌وه بوو به مه‌زه‌ی سه‌ر مێزی موزایه‌ده‌ی سیاسی و بازاڕی فرۆشی درووشمی قه‌به‌ی لایه‌نه سیاسییه‌كانی گه‌رم كرد.
ئه‌وه‌ی هه‌ستی پێده‌كرێ هه‌موو لایه‌نه‌كان له‌گه‌ڵ زیادكردنی نرخی به‌نزیندا بوون، به‌ڵام هه‌ندێ لایه‌ن وه‌ك پیشه‌ی هه‌میشه‌ییان له به‌رپرسیارێتی راده‌كه‌ن و ئۆباڵی زیاد كردنی نرخی به‌نزین ده‌خه‌نه ئه‌ستۆی پارتی دیموكراتی كوردستان، له كۆبوونه‌وه‌كان سه‌ری ره‌زامه‌ندی ده‌له‌قێنن و له شاشه‌ی كه‌ناڵه‌كانیش موزایه‌ده‌ی پێوه‌ده‌كه‌ن، له بارودۆخێكی هه‌ستیاری وه‌ك پێستادا دنه‌ی شه‌قام ده‌ده‌ن و وه‌ك خه‌مخۆری هه‌ژاران خۆیان ده‌رده‌خه‌ن و خه‌ڵك به سووتاندنی تایه و پیس كردنی ژینگه‌وه سه‌رقاڵ ده‌كه‌ن.
وه‌زیری دارایی حكومه‌تی هه‌رێم كه سه‌ر به بزووتنه‌وه‌ی گۆڕانه له‌سه‌ر به‌رزكردنه‌وه‌ی نرخی به‌نزین راستییه‌كانی وه‌ك خۆی ده‌رخستن، به راشكاوی ئاماژه‌ی به‌وه‌دا كه به‌رزكردنه‌وه‌ی نرخی به‌نزین به ره‌زامه‌ندی هه‌موو لایه‌نه‌كانی به‌شداربووی حكومه‌ت بووه‌و ئه‌وه‌ی لایه‌نه‌كان ده‌یكه‌ن موزایه‌ده‌یه، به‌ڵام لایه‌نه‌كان به بزووتنه‌وه‌كه‌ی وه‌زیری داراییشه‌وه به شێوه‌یه‌ك خوویان به گه‌وجاندنه‌وه گرتووه له به‌زمی موزایه‌ده‌ی خۆیان ناكه‌ون، كادر و هه‌ڵسووڕاو و بانگخوازی سیاسی حزبه موزایه‌ده‌چییه‌كان له كه‌ناڵه‌كان بۆ موزایه‌ده كردن سه‌ره ده‌گرن و ده‌ڵێن: ئاشتی هه‌ورامی گوێی لێنه‌گرتین و نرخی به‌نزینی به‌رز كرده‌وه، گریمان ئه‌وه‌ی ئه‌و لایه‌ن و حزبانه ده‌یڵێن راسته و موزایه‌ده نییه، باشه چوار لایه‌نی سیاسی كه خاوه‌نی (57) كورسی په‌رله‌مانین، سه‌رۆك و سكرتێری په‌رله‌مانیان هه‌یه، جێگری سه‌رۆكی حكوموت و وه‌زیری پێشمه‌رگه و دارایی و چه‌ند وه‌زاره‌تێكی تریان له‌ده‌ستدایه، شه‌رم ناكه‌ن له به‌رامه‌به‌ر وه‌زیرێك ئه‌وه‌نده لاواز ده‌رده‌كه‌ون و كورد گوته‌نی: له دانوان ئاویشیان به‌ده‌ست نییه.
خاڵێكی تر كه ده‌مه‌وێ ئاماژه‌ی پێبده‌م پرسی نه‌وت و فرۆشتنیه‌تی، لایه‌ن هه‌یه سلێمانی كۆنترۆڵ كردووه، سه‌رۆكی هه‌رێم كه به‌رزترین ده‌سه‌ڵاته له‌و سنووره كۆنترۆڵ كراوه نه فه‌رمانبه‌رێكی پێ سزا ده‌درێ و نه پۆلیسێكی پێ خه‌ڵات ده‌كرێ، كاتێكیش باس دێته سه‌ر فرۆشتنی نه‌وت ده‌ڵێن: پرسی فرۆشتنی نه‌وت شه‌فاف نییه و ئاگامان له خه‌رجی و داهاته‌كه‌ی نییه، ئه‌وه له‌كاتێكدایه كه به‌ر له فرۆشتنی نه‌وت به بۆڕی و ئێستاش له‌و سنووره ده‌سه‌ڵات پاوانكراوه‌ی ده‌ستی حزبێكی دیاریكرا و رۆژانه سه‌دان تانكه‌ر نه‌وت هه‌نارده‌ی ده‌ره‌وه ده‌كرێ، خێره لایه‌نێك بتوانێ سزا و پاداشتی فه‌رمانبه‌ر و پۆلیس پاوان بكات، كه‌چی له فرۆشتن و داهات و خێروبێری نه‌وته حه‌یاته‌كه بێئاگا و كورد گوته‌نی سیپاڵی پاش مێشان بێ، وه‌ی چه‌ند به‌سته‌زمان و فه‌قیرحاڵن! ته‌نانه‌ت ویژدانه به‌ردینه‌كانیش به‌زه‌یی پێیاندا دێته‌وه، ئه‌وه‌یه (هین) ی ناو جۆگا، له به‌ری حكومه‌ت پارووی چه‌ور داده‌گرن، له به‌ری حزب ده‌ڕشێنه‌وه، له جۆگای خه‌ڵكیش ئاوی ئۆخه‌ی ده‌خۆنه‌وه.
به‌زمی (هین) ی ناو جۆگای لایه‌نه‌كان ته‌نها له به‌رز كردنه‌وه‌ی نرخی به‌نزین و پرسی فرۆشتنی نه‌وتدا ره‌نگی نه‌داوه‌ته‌وه، كاتێك باس دێته سه‌ر گه‌نده‌ڵی خۆیان به فریشته ده‌زانن و خه‌ڵك به گه‌نده‌ڵ، سه‌ركه‌وتن و ده‌ستكه‌وت و سه‌روه‌ریه‌كان بۆ خۆیان ده‌به‌ن و شكسته‌كانیش هه‌ڵده‌ده‌نه حه‌وشه‌ی خه‌ڵكی تره‌وه.
ده‌بێ خه‌ڵك و شه‌قام ئه‌و راستییه بزانن كه لایه‌نه‌كان بۆ ئه‌وه‌ی به سه‌ركه‌وتوویی ده‌وری (هین) ی ناو جۆگا ببینن، گوتاری حزبی خۆیان دابه‌ش كردووه، بۆ نموونه له بزووتنه‌وه‌ی گۆڕان (رابوون مه‌عروف) سه‌رۆكی فراكسیۆن و وه‌زیری دارایی كه سه‌ر به هه‌مان بزووتنه‌وه‌یه، به دوو ئاراسته‌ی دژ به یه‌ك له‌سه‌ر پرسی زیاد كردنی نرخی به‌نزین ده‌دوێن، وه‌زیری دارایی ده‌ڵێ: زیاد كردنی نرخی به‌نزین بڕیاری هه‌موو لایه‌نه‌كانه و ئه‌وه‌ی ده‌گوترێ موزایه‌ده‌یه، سه‌رۆكی فراكسیۆنیش ده‌ڵێ: وه‌ك فراكسیۆنی بزووتنه‌وه‌ی گۆڕان له‌گه‌ڵ زیاد كردنی نرخی به‌نزین نین و پشتیوانی له داخوازی خه‌ڵك ده‌كه‌ین.
قوباد تاڵه‌بانی جێگری سه‌رۆكی حكومه‌تیش له راگه‌یاندراوێكدا به‌شداری هه‌موو لایه‌نه‌كانی له زیاد كردنی نرخی به‌نزینی پشت راست كرده‌وه، وه‌ك ئاشتی هه‌ورامی ده‌ڵێ: ئه‌گه‌ر بارودۆخی ئابوریش باش بێت جێگری سه‌رۆكی حكومه‌ت له‌گه‌ڵ كه‌مكردنه‌وه‌ی نرخی به‌نزیندا نییه، كه‌چی له‌ولاوه په‌رله‌مانتار و كادره‌كانیان ده‌چنه پاڵ داخوازیه‌كانی خه‌ڵك و دنه‌یان ده‌ده‌ن بۆ ئه‌وه‌ی ناڕه‌زایی ده‌رببڕن و بڕژێنه سه‌ر شه‌قام و رێگا له هه‌توچۆی خه‌ڵك بگرن، توخوا ئه‌م دووفاقیه سیاسیه له به‌زمی (هین) ی ناو جۆگا ناچێ؟
ئه‌و لایه‌نانه به په‌یڕه‌وكردنی سیاسه‌تی دووفاقی و ره‌وشت ئاسای (هین) ی ناو جۆگا ده‌یانه‌وێ ئه‌وه‌ی له سیاسه‌ت و هه‌ڵوێستی نه‌ته‌وه‌یی دۆڕاندوویانه، به موزایه‌ده و لاسایی كردنه‌وه‌ی (هین) ی ناو جۆگا تێیهه‌ڵننه‌وه، ئه‌گه‌ر وانییه له حكومه‌ت و په‌رله‌ماندا ده‌نگ و ره‌نگیان هه‌یه، له بانگه‌شه‌ی هه‌ڵبژاردندا كردبوویانه هه‌را و ده‌یانگوت: ده‌نگ له ئێوه و خۆشگوزه‌رانی و به به‌هه‌شت كردنی كوردستان له ئێمه، كه‌چی وه‌ك خۆیان ده‌ڵێن: له به‌رامبه‌ر تاكه وه‌زیرێك به چۆكدا هاتوون، جا ئه‌گه‌ر به راستی ئه‌وانه له به‌رامبه‌ر وه‌زیرێكی كورددا ئه‌وه‌نده لاواز و له‌سه‌ر چۆك بن، ده‌بێ له به‌رامبه‌ر وه‌زیرێكی عه‌ره‌ب یان دوژمنانی كورد چه‌ند داماو و چه‌ند زه‌لیل بن! بۆیه پێویسته خه‌ڵك سزایان بدا و جارێكیتر ده‌نگ به كه‌سانێك نه‌ده‌ن كه‌وا لاواز و بووده‌ڵه بن و به سووكه ئاماژه‌یه‌ك بكه‌ونه سه‌ر چۆك، لێره‌وه پێشنیاری ئه‌وه ده‌كه‌م له هه‌ر شوێنێك ئه‌وانه خۆیان وه‌ك فسفس پاڵه‌وان ده‌رخست پێیان بگوترێ: ئه‌رێ وێنه‌ی ئاشتی هه‌ورامیتان لێوه دیاره، چونكه وه‌ك به هه‌ڵوێستیانه‌وه دیاره ئاشتی هه‌ورامی به شێوه‌یه‌ك جووچكه ترسێنی كردوون، مسیان به‌سه‌ردا بتوێنرێته‌وه وێنه‌ی چیا سه‌ركه‌شه‌كانی هه‌ورامان ده‌رده‌چێ.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.