لە ماڵپەڕی Rojeva Kurd ی ڕۆژی 30.1.2014 دا خوێندمەوە کە "ئۆختای پیرانژ"ی سەر بە ئینسیاتیڤی ئازادی، بەر لە یەک هەفتە هاوپەیڤێنێکی کورتی ئەنجامداوە لەگەڵ عەبدوڵا دەمرباش‌ی کاندیدی BDP و سەرۆکی شارەوەنیی سور لە باژێڕی مەزنی ئامەد، لە وەڵامیکیدا سەبارەت بە ئاڵای کوردستان گەتوویەتی؛ ئاڵای کوردستان نوێنەرایەتی ئێمە ناکات.
پرس‌و وەڵامەکان لەگەڵ عەبدوڵاه ده‌مرباش بەمجۆرە بوە:
1- پرسیار: ئێوە دەڵێن ئەو ئاڵایەی کوردستان کە لە کۆماری کوردستاندا لە مەهاباد هەڵکرا نوێنەرایەتی ئێمە ناکات..ئایا ئەوە ڕاستە؟
عەبدوڵا دەمرباش: بەڵێ ڕاستە، ئەو ئاڵائایەی ئێوە لەخۆوە دەڵێن ئاڵای کوردستانە، ئەو ئاڵایە نوێنەرایەتی ئێمە ناکات.پارتی ئێمە ئاڵای خۆی هەیەو ئێمە ئەوە وەک ئاڵای کوردستان دەزانین‌و هەر بەوپێیە ئاماژەمان پێداوە.
2- پرسیار: باشە پارتەکەی ئێوە کوردستان ناخوازێت، ئەو خاکە ناخوازێت.گەلۆ ئێوە لەو بارەوە چی دەڵێن؟
عەبدوڵا دەمرباش: ئێمە ناکارین لە تورکان جودابینەوە.کوردو تورک یەک پارچەن‌و لەیەک دانابڕێن، وەک گۆشت‌و نینۆک وان.بەوپێیە داخوازکاری دەوڵەت بەرەودواچوونە..
گریمان کۆمەڵ لە ڕۆژهەڵاتی تورکیادا کوردستان دامەزرێنێت، گەڵۆ ئێمە دەکارین کوردان لە تورکەکان دابڕین‌و بیانگوێزینەوە بۆ کوردستان؟ تورک‌و کورد پێکەوە هاوسەرگیرییان کردووەو خێزانی مەزنیان پێکهێناو، چەندە ڕاستە ئەندامانی خێزان لەیەک دابڕێنن؟
3- پرسیار: گەلۆ مۆدێلی چارەسەریی ئێوە بۆ باکووری کوردستان چیه؟
عەبدوڵا دەمرباش: ئێمە وەک پارت لەگەڵ سەربەخۆیی دیموکراسیداین.بەڵام من دەخوازم ئەمەیش بڵێم: ساڵی پار بە تورک هاتە شارەوانی‌و بەمنی گوت: "ئێوە دەخوازن پەروەردە بکەن بە زمانی زگماکی، باشە ئەگەر لەگشت خویندگەکاندا کوردی ببێتە زمانی زگماکی، من وەک تورکێک چۆن بکارم منداڵی خۆم ببەمە بەر خوێندن؟"
من زۆر لەسەر وتەکانی ئەو خانمە وەستام‌و پاش بیرکردنەوە مافم بەودا..
لەبەرئەوەی ئەگەر ئێمە ئەوشتە بکەین بابەتێکی نەتەوایەتیی ڕەگەزپەرستانەیە.ئێمەیش دژین بە نەتەوایەتی.
.........................................................................
وەک مێژووی کۆن‌و نوێ گەواهی زۆری داوە بەوەی لەکۆنەوە لەباکووری کوردستاندا کەڵەپیاوی بەهزر کوردستانی‌‌و ڕابەری بزووتنەوەی ڕزگاریخوازی قارەمان هەڵکەوتوون.لە هەمان ئەو بارەوە من بەپێی ئەو تێکەڵییەی هەمە لەگەڵ زۆربەی باکورییان لە تاراوگە، لەوە گەیشتووم کە لە دوو قۆناغدا بەزۆری دوو جۆر هزر باڵی کێشاوە بەسەر مێشکی کوردانی سەدەی بیستی ئەو بەشەی کوردستان.
یەکەم؛ بەبۆنەی ناڵاندنی تاکی کورد لەبن زەبری سیستەمی فیوداڵیی بەشی زۆر لە ئاغاکانی نۆکەر بە دەسەڵاتی عوسمانی هەروەها شێخانی تەریقەت‌و زۆر لە شێخەکانی خاوەن تەکیەی ببوونە داردەست بۆ سیستەمی عوسمانی لەنێو کۆمەڵگەی کوردەواریدا، بەو بۆنانەوە هزری ئاینی باڵی کێشاوە بەسەر میللەتانی ژێر دەسەڵاتی خەلافەتی عوسمانی بۆیە زۆر لە کوردان کەوتوونەتە ژێر باری ئەو باوەڕدارانەی خەلیفەیان بە سیبەر خودا دەزانی لەسەر زەوی.
دووهەم؛ لەگەڵ سەرهەڵدانی بزووتنەوەی بەلشفیکی‌و بەهێزبوونی دەسەڵاتی کۆمونیستان لە 1917 بەدواوە بەشێوەیەکی تایبەت‌و لە دامەزرانی دەسەڵاتە سەرکوتکەرەکەی کەمال ئەتاتورک بەدواوە کە گشتجۆرە دیاردەکانی نەتەوایەتیی وەک زمان‌و کولتوور بەشێوەیەکی گشتی قەدەغەکرد لە زۆر منداڵ‌و لاوی کوردی ئەو سەردەمە، بەتایبەتی خوێندکاران.بەوبۆنەیەشەوە کە سیستەمی کۆماریی تورکیا کە لە سەرەتای دامەزرانیەوە خۆی وەک سۆشیالیست ناساند، ڕێگە خۆشبوو بۆ لاوان بەئاسانی دستیان بگاتە بەرهەمەکانی مارکسییەت بە گشتی‌و کۆمۆنستی بەتایبەتی.لەهەمان کاتدا هەست بە نایەکسانی ژیان‌و جەورو ستەمی سیستەمی دەسەڵات ئەوانی خۆلیاکرد بەو سیستەمە کۆمۆنیستییەی لەوڕۆژەدا خۆی وەک پارێزەری چینی چەوساوەی میللەتانی جیهان ناساند، بۆیە جگە لەو ڕێژە کەمەی لەبەر برسێتی یان لەترسان خۆیان کردووە بە تورک، ئەوانەی لە ڕەوت‌و ڕێچکەی باوان لایانداوە وایان زانیوە کە تەنها ڕەوتی مارکسییەت یان کۆمۆنیستی لەو قەیرانە دەربازیان دەکات.بۆیە ئەمڕۆ دەبینین تەنانەت ئەوانەی کوردایەتیش دەکەن هەر کاریگەری ئومەمییەتی عیلمانی "بیرکردنەوە لە دەوڵەتی نەتەوەیی بیری پاشکەوتەییە"یان ئوممەی ئیسلامی "موسوڵمانان وەک ددانی یەک شانە یەکسانن، بەڕێزترین ئەوانەن کە خاوەن بتەوترین باوەڕن).
ئەم کورتە پێشەکییەم لەسەر ئەوەیە کە جێی داخە کەسێکی وەک عەبدوڵا دەمرباش کە لەنێوان ساڵانی 1987 – 2000 مامۆستای فەلسەفەبووەو لە هەڵبژاردنەکەی ساڵی 2004ـەوە تا ئەمڕۆ سەرۆکی شارەوانیی سوورە لە باژاڕی مەزنی ئامەد، لەو ماوانەدا چەندین جار بەندکراوە لەسەر پشتگیریی خوێندنی منداڵان بە زمانی دایک، بەڵام مەخابن ئەمڕۆ نە تەنها پەشیمان بوەتەوە لە پشتگیری زمانی زگماکیی نەتەوەکەی بەڵکو وا پەشیمانە لە خەباتی نەتەوایەتی‌و ئەو ئاڵایەی کوردستانیش کە گۆڤاری هاوری ژمارە پێنجی ساڵی 1932 ئاماژەی ڕێزدار جەلادەت بەدرخان بە دوو شێوە پیتی لاتینی‌و ئارامی بڵاوکردووەتەوە، دەکاتە هەمان ئەو ئاڵایەی بە بڕیارێکی فەرمی کرا بە ئاڵای کۆماری کوردستان‌و پێشەوا قازی محەمەدی بەدەستی خۆی لە مەهاباد هەڵیکرد.
ڕێزدار جەلادەت گوتوویە: Alê Kurdan
Ala Kurdan di nav rok..çi bedew û bi heybet, bi çar reng î, rengên te, çi delal û çi xweşkok, xêzek kesk û xêzek sor, nav spî û nîvek zer, keskesor e, bi roj e, ev li jêr û ew li jor
واتە: ئاڵاێ کوردان
ئاڵای کوردان بەڕیزی ڕێک، چەندە جوانەو بە شکۆ، بە چوار ڕه‌نگ، ڕه‌نگاڵە، چەندە ده‌لالە‌و قەشەنگ، هێڵێک که‌سک‌و یەک هێڵ سۆر، ناوەندی سپی لەنێویدا زه‌رد، که‌سکه‌و سۆر، لەگەڵ ڕۆژ، ئەم لە ژێرو ئه‌و لە ژۆر،