هه‌ر كه له ده‌رگای مزگه‌وت هاتمه‌ده‌ر، قسه‌ی وتار خوێنه‌كه هه‌ر له دڵمدابوو كه ده‌یگوت "ده‌بێت له‌خۆمانه‌وه ده‌ست پێ بكه‌ین". به‌ڵام به‌پێچه‌وانه‌وه تاكگه‌لی ئێسته ته‌نها له خۆیه‌وه ده‌ست پی ناكات، كاتی له رێڕه‌وه‌كه هاتمه خواره‌وه وه‌ك هه‌موو هه‌ینییه‌كان هه‌مدیسان شتی سه‌یرم بینی.
پیاوێك له‌به‌ر ده‌رگای مزگه‌وت كۆمه‌ڵێك ستڵی به قسه‌ی خۆی "پڕ له هه‌نگوین"ـی له‌پێش خۆی دانابوون و هاواری ده‌كرد "هه‌نگوینی ئه‌ێڵی!".
پیر و منداڵ و جه‌وان ده‌وره‌یان دابوو، هه‌ر كه‌سێكم ده‌بینی خه‌ریكی هه‌ڵقۆڕاندنی گیرفانی بوو، كابرا ده‌یگوت ستڵی به 15 هه‌زار دینار، ئاخر كیلۆیه‌ك هه‌نگوینی ئه‌ێڵی زیاتر له 35 هه‌زار دینار ده‌كات، خێره ئه‌م خه‌مخۆره هه‌نگویًنه‌كه‌ی خۆی هه‌رزان فرۆش ده‌كات! له گه‌رمه‌ی مامه‌ڵه‌دا بوو له‌گه‌ڵ ئه‌و كه‌سانه‌ی تازه له مزگه‌وت ده‌هاتنه‌ده‌ر، خۆ به‌م مانگه ره‌مه‌زانه كابرا ده‌زانی هه‌موویان به ڕۆژوون، خۆ ئه‌گه‌ر تامه‌كه‌یشی شیرین نه‌بێت كه‌س ناتوانێت تامی بكات، خۆ ئه‌گه‌ر كه‌سێكیش به‌ڕۆژووش نه‌بێت ناتوانی له‌به‌ر چاوی ئه‌و خه‌ڵكه تامی هه‌نگوینه ئه‌ێڵییه‌كه‌ی بكات. . بۆیه گه‌نجێك كه له ته‌نیشتم راوه‌ستابوو ده‌یگوت كاكه كاكه به 14 هه‌زار نابێت؟ ئه‌ویش پێی ده‌گوت له‌به‌ر خاتری ئه‌و نوێژه‌ی ئێستا ئه‌نجامت دا قه‌ینا بیبه. !
مامه حاجییه‌ك ستڵێكی نزیك كرده‌وه له چاویلكه‌كه‌ی و دیقه‌تم دابوو ده‌یگوت "ئه‌وه هه‌نگوینی مێشه ڕه‌شه‌یه، خۆ دیاره هه‌ر له هه‌نگوینه‌كه‌ی زۆر ئه‌ێڵییه!".
ئه‌و (رۆژوو) ـه وا له پیاو ده‌كات ئه‌گه‌ر به‌ردیش له‌سه‌ر مێز دابنێیت و كه‌مێك شیرینی پێوه بكه‌یت ده‌نكێكی نامێنێت، چه‌ند كه‌سێك هه‌ر به ده‌ردی گه‌نجه‌كه‌ی ته‌نیشتم ستڵه هه‌نگوێنه‌كه‌یان كڕی، گه‌نجێكیش وادیاربوو رۆژووه‌كه تاقه‌تی بڕیبوو وه‌كو رێوی چڵێس زاری پڕ له ئاو ببوو، ستڵێكی هه‌ڵگرت و گووتی"ئه‌گه‌ر به 10 هه‌زار دینار ده‌بێت با هه‌موومان هه‌ڵی گرین و نه‌جاتت بده‌ین".
كابراش وایده‌زانی خه‌ونه، ئاخر بۆ كابرا له‌وانه‌یه به 5 هه‌زاریش قازانجێكی زۆر بكات، چۆن؟ دواتر بۆتان روونده‌كه‌مه‌وه.
بۆیه كابراش به‌هه‌مان قسه‌ی كڕیاری پێشوو وتی" قه‌ینا له‌به‌ر خاتری مانگی ره‌مه‌زان و ماڵی خودا بیبه‌ن، با منیش بگه‌ڕێمه‌وه ماڵه‌وه‌و پشوویه‌ك بده‌م منیش به‌ڕۆژووم!".
ئیتر له‌چاوتروكانێكدا ده‌نكه ستڵێك له‌و ناوه نه‌ما. .
كابرایه‌ك كه وه‌ك من واقی وڕمابوو، سه‌یرێكی كردم و شانی گرتم، دووری خستمه‌وه و گووتی: وه‌ره با شتێكت بۆ بگێڕمه‌وه. .
منیش وتم فه‌رموو. .
كابرا به هێواشی گووتی: "له ساڵی هه‌شتاكان له به‌غدا له هۆتێلێك بووم، رۆژێكیان هاتمه ده‌ره‌وه بۆن كرووز ده‌هات (بۆنی سووتان) منیش پرسیاری ئه‌و بۆنه‌م له كارمه‌ندێكی هۆتێله‌كه كرد، ئه‌ویش گووتی: له ژێر زه‌مینه‌كه مه‌حمه‌لێكی لێیه ئه‌توانی سه‌یری بكه‌یت".
ئه‌و كابرایه گووتی: "كاتێك كه چوومه ژێر زه‌مینه‌كه كه‌س به كه‌س نه‌بوو، پوشكه‌ی ته‌نكیان له‌ناو ته‌نه‌كه‌ی بڕایه‌وه دانابوون و شیله‌ی خه‌ستیان به‌سه‌ردا ده‌كرد، به‌هه‌مان ئه‌و شیله‌یه‌ی ئێستا پاقڵاوه‌ی پێوه دروست ده‌كرێت، وتم كاكه ئه‌وانه چین؟ ئه‌وانیش وتیان ئه‌وه هه‌نگوینه و قازانجێكی زۆر ده‌كات، واتا ته‌نها پوشكه‌ی دروستكرا و شیله‌ی شه‌كر".
ئیدی به‌هه‌مان شێوه كابراش وه‌ك هه‌نگوینه‌كه‌ی به‌غدا دروستی كردبوو، به‌ڵام تاكه‌كانی ئێستا له جۆر و چۆنیه‌تی دروستكردنی ئه‌و خواردن و خواردنه‌وانه ناكۆڵنه‌وه كه پاره‌ی پی ده‌ده‌ن، هه‌موومان خاوه‌نی بیر و ئایدۆلۆژیای خۆمانین، هه‌موومان له‌به‌ر ده‌ستی خۆماندایه ئه‌گه‌ر كه‌سێك فێڵمان لی بكات، بۆیه ئه‌گه‌ر رۆژێك له رۆژان تووشی ده‌ردێك یاخود ئاریشه‌یه‌ك هاتین نابێت یه‌خه‌ی كه‌س بگرین، به‌ڵكو هه‌ر خۆمانین كه بڕیار له‌سه‌ر چاره‌نووس و كرده‌وه‌كانی خۆمان ده‌ده‌ین، هه‌ر خۆشمانین كه دوژمنی خۆمانین.
ئه‌ری به‌راست كێ خه‌تاباره. . . ئه‌و كابرایه‌ی فێڵی له كۆمه‌ڵگای خۆی ده‌كرد، یان ئێمه؟
فرۆشیاری ساخته‌چی دوژمنی ئێمه‌یه یان خۆمان دوژمنی خۆمانین؟
ئه‌ری به‌راست به قسه‌ی وتار خوێنه‌كه‌مان كرد و له خۆمانه‌وه ده‌ستمان پێ كرد؟ بۆیه تا له‌خۆمانه‌وه ده‌ست پی نه‌كه‌ین و گۆڕانكاری له خودی خۆمانه‌وه نه‌كه‌ین، ناتوانین كۆمه‌ڵگا بگۆڕین.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.