ئه‌وه‌ی نۆی مانگ له شاری مووسڵ رووی دا و دواتر ناوه‌ڕاستی عێراقی گرته‌وه، رووداوێكی له‌ناكاو بوو له‌به‌رئه‌وه‌ی دانیشتوانی ناوچه‌ی عه‌ره‌بی سوننه هه‌رچه‌نده له سیاسه‌تی مه‌زه‌بییانه‌ی مالیكیش ناڕازین، به‌ڵام تازه مانگێك و چه‌ند رۆژێك به‌سه‌ر هه‌ڵبژاردنی گشتیدا تێ په‌ڕیبوو، كه هه‌موو لا، به لیسته‌یلی سوننشه‌وه به به‌شی خۆیان له هه‌ڵبژاردنه‌كه رازی بوون. ریزبه‌ندییه‌كی تازه‌ی سیاسی خه‌ریك بوو ده‌هاته كایه‌وه بۆ رێگرتنه‌وه له نووری مالیكی، كه ده‌یویست ببێته‌وه به سه‌رۆكی وه‌زیران. ئه‌وه‌ی رووی دا، وه‌ك ئه‌خزه‌ر ئیبراهیمیی ده‌مڕاستی ده‌ست له‌كار كێشایه‌وه‌ی نه‌ته‌وه‌یلی یه‌كگرتوو و كۆوه‌ندی عه‌ره‌بی بۆ چاره‌سه‌ری كێشه‌ی سووریه، گوتی: به‌بندانه‌وه‌ی كێشه‌ی چاره‌سه‌رنه‌بووی سووریه‌یه. تۆنی بلێری سه‌رۆك وه‌زیرانی پێشووی بریتانیه‌ش هه‌مان دیتنی هه‌یه. واته به‌شێوه‌یه‌كی ناڕاسته‌وخۆ، ئه‌وه‌ی له مووسڵ یان به گشتی له عێراقدا روو ده‌دا چ ململانه‌ی تایفه‌یی بێ و چ به‌سه‌رداهاتنی داعش بێ بۆ به‌رفره‌كردنی ئه‌و ململانه‌یه، به‌رئه‌نجامی سیاسه‌تی هه‌ڵه‌ی رۆئاوایه به‌تایبه‌تی ئه‌مه‌ریكه. له‌به‌رئه‌وه‌ی گرژیی ناوه‌خۆی عێراق هێشته زووی بوو بۆ ته‌قینه‌وه‌یه‌كی وا. مرۆڤ ده‌توانێ له‌وه‌ش تێ بپه‌ڕێنێ و بڵێ سیاسه‌تی ده‌ره‌وه‌ی ئه‌مه‌ریكه له سه‌رده‌می ئۆبامه‌دا برێتییه له كه‌ڵه‌كه‌كردنی ته‌نگژه به‌سه‌ر یه‌كتردا. له ته‌نگژه‌ی سووریه‌دا نه‌یتوانی هه‌ڵسێته‌وه، چوو له ئۆكرانیه‌دا یه‌كێكی تری نایه‌وه، له‌وێش كه‌وت و هه‌ڵنه‌ستایه‌وه. ئیتر بۆ داپۆشینی نووچدانی ئه‌وێی، گه‌ڕا ته‌نگژه‌یه‌ك له شوێنێكی تردا بنێته‌وه، به‌داخه‌وه ئێمه‌ی به‌ركه‌وتینه‌وه.
هه‌رچه‌نده ئه‌وه‌ی ئێسته له عێراقدا روو ده‌دا، بۆ هه‌موو لایه‌كی خه‌ڵكه‌كه‌ی، چ كورد چ سوننه و چ شیعه، دڵخۆشكه‌ر نییه. به‌ڵام دڵخۆشكه‌ریشه له‌لایه‌كی تره‌وه له‌به‌رئه‌وه‌ی ره‌نگه ببێ به پاڵه‌په‌ستۆ به‌ره‌و چاره‌سه‌رێكی بنه‌بڕ. ئه‌مه ئه‌گه‌ربێو ئه‌مه‌ریكه تێ هه‌ڵنه‌قورتێ و چاره‌سه‌رێك به‌گوێره‌ی به‌رژه‌وه‌ندی خۆی نه‌سه‌پێنێ. ده‌بێ له‌بیرمان نه‌چێته‌وه، كه چاره‌سه‌ری ئه‌مه‌ریكه‌یی بۆ هه‌ر كێشه‌یه‌ك، برێتییه له چاره‌سه‌ر بۆ كێشه‌یه‌كی تر نه‌ك كێشه به‌رده‌سته‌كه خۆی. ئه‌و خۆ بێ ئاگا پێشاندانه‌شی له هاتنی داعش بۆ مووسڵ، هه‌روه‌ها خۆ له گێلیدانی كۆماری ئیسلامی، هه‌ردووك جێی گومانن. به‌تایبه‌تیش كه ئه‌مه‌ریكه له‌م رۆژانه‌ی دواییدا، واته پێش چیڕۆكی داعش له مووسڵ، باسی دۆزینه‌وه‌ی چاره‌سه‌رێكی له نێوان رێژیمی به‌شار ئه‌سه‌د و به‌رهه‌ڵستیی سووریه‌دا ده‌كرد نه‌ك رماندنی رێژیمه‌كه وه‌ك پێشتر. هه‌ڵگیرساندنی فه‌رته‌نه‌یه‌ك له عێراقدا ره‌نگه به‌كه‌ڵكی ئه‌وه بێت چاره‌سه‌رێك بۆ ئه‌و شه‌رمه‌زارییه‌ی له سووریه‌دا، بدۆزێته‌وه و به دڵی كۆماری ئیسلامیش بێ.
با واز له‌وه بێنیین له‌به‌رئه‌وه‌ی سه‌رۆك ئۆبامه خۆشی نازانێ له سیاسه‌تی ده‌ره‌كیدا چی ده‌كا تا من و تۆ بێین شیی بكه‌ینه‌وه. كێشه‌ی خۆمانی كورد بۆ ئێمه گرینگتره له هه‌موو دنیا. گوتوویانه "هه‌ر شه‌ڕێك بۆ جوامێرێك"، ئه‌وه‌ی داعش گێڕای، بۆ كورد ئه‌وه‌ی تێدا بوو گشت ناوچه‌ی دابڕاوی خۆی كه‌وته‌وه ده‌ست. ماده‌ی 140 به 140 ساڵی تریش جێبه‌جێ نه‌ده‌بوو. ئێسته‌ش دوای گه‌ڕانه‌وه‌ی ئه‌و ناوچه‌یله، پێویسته وتارمان له ئاستی نووری مالیكیدا بگۆڕین. ئه‌و بازنه سووره‌ی له ده‌وری ناوی ویدا كێشاومانه بكه‌ین به بازنه‌یه‌ك بۆ دان و ستاندن نه‌ك مه‌رجی (نابێیه‌تی) . ئێمه‌ی كورد هه‌تا هه‌تایه نوورییه‌كی ترمان ده‌ست ناكه‌وێته‌وه سوپایه‌كی ئه‌وه‌نده شڕی هه‌بێ فریا نه‌كه‌وێ، كه هه‌ڵات چه‌كه‌كه‌ی له‌گه‌ڵ خۆیدا ببات. با كورد ئه‌وه‌نده پێ دانه‌گرێ له‌سه‌ر نه‌مانه‌وه‌ی، له‌به‌رئه‌وه‌ی ئێسته ئه‌مه‌ریكه لێی كه‌وتووه‌ته گله‌یی و ره‌نگه بیه‌وێ لای بدا. ئێرانیش حه‌ز ده‌كات ئه‌و ده‌موچاوه بگۆڕێ به ده‌موچاوێكی تر جیاواز نه‌بن له ناوه‌ڕۆك به‌ڵام ئه‌وه‌ی دێ خۆی شه‌ریفتر پێشان بدا و به‌ڵێنی درۆش زۆرتر هه‌ڵڕێژێ. بادانه‌وه‌ی كورد له پرسی مالیكی، به‌رژه‌وه‌ندییه بۆمان له رووی ستراتیجه‌وه. یارمه‌تیده‌ریشه بۆ خاوكردنه‌وه‌ی ده‌ماری خه‌ڵكی شیعه مه‌زه‌و له به‌رامبه‌ری كورددا، كه ماوه‌ی دوو ساڵه رۆژ به‌ڕۆژ گرژتر ده‌بێ.
من یه‌ك به باری خۆم گله‌ییم له نووری نه‌ما. مانه‌وه‌شی بۆ چوار ساڵی تر له ده‌سه‌ڵات به باش ده‌زانم تاكو هه‌ڵه‌ی وا بكاته‌وه رێخۆشكه‌ر بێ بۆ جیابوونه‌وه‌ی ته‌واوی كوردستان به‌بێ هیچ ریسك و مه‌ترسییه‌ك، بێگومان به كه‌ركووك و هه‌موو شارۆكه و ناوچه و گوند و ته‌نانه‌ت دار و به‌ردێكی كوردستانه‌وه، كه به‌شێكی ته‌واوی تا نۆی مانگ و داهاتنی داعش و هه‌ڵاتنی سوپای عێراق، له ده‌ره‌وه‌ی ده‌سه‌ڵاتی ئێمه‌دا بوون. هاتنه‌وه‌ی هه‌موو بستێكی خاكی كوردستان بۆ سه‌ر هه‌رێم، ده‌بێ به‌س بێ تا گرژیی ده‌ماری ئێمه‌ش كه‌م بكاته‌وه و ئه‌وه‌نده له به‌ختی ناپوختی خۆمان به‌سكاڵا نه‌بین. ئه‌گه‌ر كوردستان له‌مه‌ولا هه‌موو داهاتی خۆشی ته‌رخان بكا بۆ دروستكردنی پێشمه‌رگه و پاراستنی سنووری تازه‌ی هه‌رێم، به زۆری نه‌زانین. شانازیی كورد له مێژوودا دوای ئه‌و هه‌موو ره‌نجه‌ڕۆیییه، له‌وه‌دایه هیچ بستێك له خاكی خۆی به‌جێ نه‌هێڵێ له ئاواره‌ییدا. سوپاس بۆ نووری مالیكی. به‌ڕاستی پیاوی وا ناوه‌شاوه، بۆ به‌ختی كورد كه‌م هه‌ڵده‌كه‌وێته‌وه.