ئەگەر لەشەڕو شۆڕشەکاندا بەزۆرى پیاو دەکوژرێن و دەبنە قوربانى بەڵام نابێ ئەوەمان لەبیر بچێت کە پیاوەکان باوک یا برا، مێرد یا کوڕى ژنەکانن، کەبۆ ژن ئازارەکەى هیچى لەکوشتنى خۆى کەمتر نییە.
ئەمە جگە لەوەى بەدرێژایی مێژوو لەهەموو شەڕوداگیرکاریەکاندا دەستدرێژى بۆسەر ژنان یەکێک بووە لەو ئامرازانەى کە سوپاى داگیرکەر بۆچاو شکاندن و سوکایەتى و بریندارکردنى شکۆى بەرامبەرەکەى بەکاریهێناوە، مێژووى شەڕو داگیرکاریەکان هەزاران نموونەى قێزەوەنى لەم جۆرەى تێدایە کە گێڕانەوەیان لەژماردن نایات، دیارە ئەم تراژیدیایە هەرتەنها لەشەڕو غەزەواتە ئاینیەکان نەبووە، یا تەنها لەشەڕو داگیرکاریەکانى مەغۆل و تەتارو تەیمورو هۆلاکۆو جنگیزخان . . . هتد نەبوو، کە دروشمێکى هەبوو لەشەڕەکان کاتێ دەیگوت (سەرکردەى هۆزە نەیارەکانى خۆت بکوژە ڕەعیەتەکانیشیان بکە بەرەعیەتى خۆت)، بەڵکو لەشەڕى بەناو وڵاتە پێشکەوتووەکان و لەڕابردوێکى نزیکیش ئەو تراژیدیایە بەرچاو دەکەوێت، هولوکۆستى جولەکەکان و قەتل و عامى کوردو ئەرمەن و ئاشوریەکان لەمێژوودا تا دەگاتە شەڕەکانى جەنگى جیهانى کەوێڕاى وێرانى و داگیرکارى لەهەرهەمووشیان دەستدرێژى بۆسەر ژنانى لێکەوتۆتەوە، سۆڤیەتیەکان کاتێ لە شەڕى دووەمى جیهانیدا (بەرلین)ى پایتەختى ئەڵمانیایان داگیرکرد، وەزیرى بەرگرى فەرمانى بەئەفسەرو سەربازەکانى کرد، کەهەر ژنێکى ئەڵمانیان بینى دەستدرێژى بکەنە سەر کە بەمەش (2)ملیۆن ژن و کچى ئەڵمانى بەرشاڵاوى ئەو دەستدرێژیە کەوتن، دیارە لەمەش کارەساتر ئەوکاردانەوەى سۆڤیەتیەکان لەبەرامبەر ئەو دەستدرێژیە هات کە نازیەکان لەساڵى (1941) دا بەژنە ڕوسیەکانیان کردبوو، هەروەک نازیەکان لەکاتى داگیرکردنى فەرەنسادا جگە لەدەستدرێژى بۆسەر ئافرەتانى فەرەنسا، بڕیاریاندا لەبەرامبەر کوشتنى هەر ئەڵمانیەک لەفەرەنسا (400)هاوڵاتى ئەو وڵاتە بکوژن بەبێ جیاوازى کردن لەنێوان ژن و پیاوو مناڵدا.
دیارە بەعسیەکانیش لەئەنفالکردنى کوردستاندا کەوەک ئێستاى (داعش) ئیسلامیان وەک ئامرازێک بۆئەنجامدانى تاوانەکەیان بەکارهێنا، وێڕاى زیندەبەچاڵکردنى (182)هەزار کەس، سوکایەتى و دەستدرێژیان بەهەزاران ژن و کچى کورد کرد، ئەوەتا لەئێستادا دواجار کە دواجارنابێت ڕێکخراوى تیرۆرستى (داعش)لەداگیرکردنى شەنگال و زومارو دەوروبەریدا، هەمان شت، بگرە قێزەوەنترى بە ژن و کچانى ئێزیدى کرد، کە ئەو ژن و کچانە وێڕاى کوژرانى باوک و براو مێردو کوڕەکانیان بەبەرچاویانەوە، خۆشیان ڕاپێچى شوێنى ئەتککردن و حەرام سەراى ئەمیرەکانى ئەو ڕێکخراوە تیرۆرستیە کران، تراژیدیاى ئێزیدیەکان کەدەچێتە خانەى جینۆسایدەوە قەسابخانەیەکى ترە دژ بە ئێزیدیەکان کەدەچێتە پاڵ ئەو (72)قەسابخانەیەى کە دەگوترێ ئێزیدیەکان لە مێژووى خۆیاندا ڕووبەڕووى بونەتەوە.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.