گرنگیی پاراستنی نهێنیی ستراتیژییەتی جەنگ ... گۆمەیی

مایەی دڵخۆشی ئەوەیە کە دەبینین ئەمڕۆ مرۆڤی کورد لە هەرچوار پارچەی کوردستاند هەروەها ڕۆڵەکانیان لە هەندەرا بێ گوێدانە بیروباوەڕی ڕامیاری‌و ئایدیۆلۆژی جیاواز ئەو سنوورە جوگرافییەیان بەزاندووە کە سەدساڵ لەمەوبەر هێزە ئیمپریالیستەکان کوردستانیان پێ کردووە بە چوارپارچەو بەدرێژایی ماوە ئەو سنوورە لەمێشکی بەشی زۆر لە کورداندا جەسپیوە تا ئەوڕادەیەی زۆرکەس لەبری هزری کوردستانی بوون خۆیان بە عیراقی، ئێرانی، تورکیاو سوریایی بزانن.

هیچ گومان لەوەدانییە کە چوونی پێشمەرگە بۆ یارمەتی شەڕڤانان‌و بەرگری لە کۆبانی، سەرەڕای ئەوەی بۆ دوورخستنەوەی نەهامەتییە لەو سەدان هەزار هاووڵاتییە کوردەی ئاوارەبوون‌و پاراستنی ئەو خاڵە ستراتیژییە لەخاکی کوردستان، هەڵوێستەکە بە کردەیەکی زۆر گرنگی نەتەوایەتی دەژمێردرێت لەبۆ یەکخستنی هێزو توانای میکانیزمی بەرگری لەسەر ئاستی کوردستانی مەزن، بەڵام مایەی نیگەرانی ئەوەیە کە ئەمڕۆ لە مێدیا کوردییەکاندا درکاندنی نهێنییە سەربازییەکاندا بەجۆرێک بووە بەباو، سەرکردەیەکی لەشکر ژمارەی جەنگاوەران‌و جۆری چەک‌و ڕێگای چوون‌و جۆنێتی بەرەنگاربوونی هێزەکانی دوژمن بەئاشکرا بۆ مێدیاکان دەگێڕنەوە ئەوانیش لەبەر شانازیی دەسپێشخەری بلاوکردنەوەی نووچەکە یان فرۆشتنی هەرچی زۆرتر ژمارەی ڕۆژنامەکانیان هەندێک ترش‌و خوێی پێوەدەکەن‌و بڵاوی دەکەنەوە.

من وەک چەندین ساڵ کارکردنم لە لەشکری عیراق‌و ماوەی چەندساڵ کادر لەدەزگایەکی نهێنگای شۆڕشی کوردی‌و خوێندن‌و ڕاهێنانی تایبەت لەوبوارانەدا بە سەرپەرشتی مامۆستاو پسپۆری بیانی لەوە گەیشتووم کە ئەو تاکتیکەی ئەمڕۆ بەرپرسانی لەشکرو مێدیاکان گرتوویانەتە بەر زۆر هەڵەیە، چونکە ڕاستەوخۆ بە دوژمن دەڵێن "خۆگرن وا هاتین‌و بزانن چیجۆرە چەکمان پێیەو چۆن گورزتان لێ دەوەشێنین" وەک لەوەی نەزانن جۆن دوژمن خۆی بۆ بەرپەرچدانەوەیان ئامادە دەکات.

بەڵێ ئەوە ڕاستە کە جەماوەری کورد ورەی بەوە بەرزدەبێتەوە کە ببینێت هێزەکانی کوردستان بەرانبەر بەدوژمن یەک دەنگ‌و یەک بازوون، بەڵام لەبەرانبەردا دوژمن دەکارێت خەڵکانێکی سەربەخۆی بنێڕێتە نێو ئەو جەماوەرەی (وەک ئەمڕٶ لەمێدیاکاندا بڵاوکرایەوە) لەباکوور خۆیان ئامادەکردووە لەپێشوازی ئەو هێزەدابن. ئەوجا لاساییکردنەوەی داعش لە جۆری تۆقاندنی هاووڵاتییان لەڕێگای مێدیاکانەوە زۆر جیاوازە چونکە جۆری کاریگەری‌و دەنگدانەوەی ئەو بڵاوکراوانە جیاواز دەبن.

میتودی کارکردنە سەر باری دەروونی جەنگاوەر بۆئەوەی نەتوانێت بەباشی بجەنگێت یان هەندە مێشکی تەڵخ بکات بە سووکترین هێرش کەوتنە سەری ورەبەردات‌و گۆڕەپانی جەنگ جێهێڵێت ئەوەیە کە دوژمن ئەوە بڵاوکاتەوە کە هێرشی بردووەتە سەر هێڵەکانی پشتەوە جەنگ یان بۆسەر ئەو کۆمەڵگایەی خاوخێزانی جەنگاوەرانی لێدەژین ئەوکات جەنگاوەر دەکەونە بیرکردنەوە لە ژن‌و منداڵ‌و خزم‌و خێش، وەک ئەوەی بینیمان داعش بەر لە هێرشەکانی بۆ سەر موسڵ یان شارە عارەبییەکانی تری عیراق، هەروەها شارو شارۆچکەکانی هەرێمی کوردستان لەڕێگای مێدیاکانەوە دانیشتوانی تۆقاندووە. .

بەڵام بەکارهێنانی ئەو میتوودە مێدیاییەی ئەمڕۆ هێزەکانی کورد بەکاریدێنن جیاوازە لەگەڵ ئەوەی داعش کە تۆڕێکی تیرۆریستە بەکاریدێنێت، لەبەر ئەم هۆیانە:ـ

یەک: جۆرێک لە بیرکردنەوە پاڵی بە تیرۆریستانی داعشەوە ناوە گوایە ئەوان جەنگی پیرۆز دەکەن دژ بە کەسانی کافر، خۆ ئەگەر بیشکوژرێن ئەوا دەگەنە ئەو بەهەشتەی ئاواتیانە، بۆیە بێترس‌و دڵەڕاوکێ تا دواهەناسە دەجەنگن.

دوو: ئەو تیرۆریستانە هەریەکەو لە وڵاتێکەوە هاتوون، هیچکەس یان خێزانیان جێنەهێشتووە لەو شوێنانەی هێزەکانی کورد هێڕشیان دەکاتەسەر، بۆیە هیچجۆرە گەردێک ناکەوێتە مێشکی ئەو تیرۆریستانە تا ببێتە هۆی ورەبەردانیان.

سێ: ئاواتی جەنگاوەری کورد ئازادکردنی ئەو خاکەیە کە هەرگیز تێیدا خۆی بە سەربەست نەزانیوە بۆیە دەخوازێت خۆی لەپێناودا بکاتە قربانی، بەڵام ئەگەر بیری بۆئەوە بچێت کە لەپاش خۆی منداڵانیشی لەناودەچن یان ناڕەحەت دەژین ئەوا ئاسانە ورە بەربدات، بەڵام خاکی ئەم دونیایە لەلای تیرۆریستانی داعش هیچ گرنگ نییە بەڕادەی ئەوەی بیری لێدەکاتەوە کە لەناوبردنی ئەو مرۆڤانەی بەکافریان دەزانیت چونکە بە ئەنفال کردنی ئەوان پانتایی بەهەشت‌و پاداشتی حورو غیلمان وەدەست دێنێت.

گۆمەیی

سوید ـ ٢٧/ ١٠/ ٢٠١٤

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.